Itna’ thu
Pauzagin Tonsing
“Tu in, Haupu, Awlmohhau hun i pe dia, ama’n itna bang hihiam chih hon gen ding ahihman in theihsiam chiat sawm in i bil uh palh sak in, nakvang leh mit dim a tankhak sawm in i ngai khe ding uh, tu in i sam ahi,” chi in hunkemtu in Haupu tuh thugenna nei ding in a sam hi.
Haupu’n ahun hon la a, “Hiai bang gen thei ding a hun piak a ka om man in ka kipak petmah hi. I gen ding thu uh itna kichi theihsiam theih ngei tuanlouh ding thu ahih ziak in tomkim in i gen ding uh.”“Amasa in itna na mu thei hia chi in kidong le’ng kuamah itna mu ngei a om kei ding. Itna kimuthei lou himahleh a nasep apan in atheihtheih hi. Muh teitei sawm in koisan apan itna hong kipan hiam chi in I taksa pum teng zong mahle i mu kei ding. Itna kigen chiang in lungtang a kipan chih ngaihdan a om, tuaziak mah ahi ding itna chiamtehna ding a lungtang lem a kizat. Ahihleh itna lungtang a kipan ahihleh sem zak in zongle huai ah a om tuan diam? Om tuan hetlou ding ahi. Lungtang lam siam Daktor-te phelneen sak in zong leng zong, ‘hiai ah itna a om bilbel vele!’ chih ding amu tuan het kei ding uh. Ahihleh itna koi a om hipeuhmah ding hiam, mihing sapum a omna ding ka ngaihtuah khe zou kei! Bangziak ahi diing? Muhtheih ka sawm ziak lel ahizaw hi. Tua ziak in itna zaw muh theihlouh mah hi ding hi.”Itna’ lim-le-puam mu thei keimahle le thil lamdang tak ahi. A nasepdan ah itna tuh a kilang thei hi. Sepdan tuamtuam a akilat ziak in kuama’n a theisiam thei kei uh. Gendan kibanglou chiat in a gen ua, suidan tuam chiat in a sui uhi. Khovel om tung apan tuni tan in itna thu gen in om mahleh gentawp theih in a om kei a, theihsiamdan tuam chiat in a kilang thei lailai hi.Itna khat himahleh gentehna tampi zat in a omta a, atuam leh kidang bang ngen in gen in a om hi. Mi a tuam dungzui in gendan tuam in a gen ua, tehkakna tuam a zang zel uhi. Midang khat a ding a chiang mahmah leng khat a ding a bangmahlou mai a hi a, khat a ding a houlua i chihsak leng midang a ding in thupi lua leng a hizel hi. Kuata’n hiai bang theisiam thei tha-hah ding i hi ua awi?Mi tampite’n itna ziak in hiai khovel a paisanta uh. Itna ziak a khovel nuam tak a zang utte’ himahleh uh a zatma un, a kilawmna taktak a theihma un a khovel hinkhua uh ning in sihna hanmual ah a liamsan maimah uhi. It luat vang a nuamtal sawmte’ a ding in hiai khovel paisan mahle uh a sihnung ua mite’ hunzatdan ding a ngaihtuah chiang un kisik tuntun ding un gintak huai zozen hi. Duhse lua akta kilohkhuh suak mai uhi. A itte uh toh midang in khovel a zatkhawm ding uh lause lua in hun lemtang a bawlsak ua, a soisak utte uh kipakna tel in chia maw? Tua bang a itna ziak a na hinna pe dia na kisak khak zenzen leh kingaihtuahinla, nang omlouh nung a mi’n hiai leitung hinkhua nuam tak a zang thouthou ding ahi uh aw, na ngaihtuahna kikhel sak mai in.Thugen siam leh la phuaksiamte’n itna tuh gen in a sak khum zel ua, gen behdan ding a vang mahmah a ahi ding ‘Aw itna’ chih tuh a thupi pen ahi mai hi. Gen chiang a haksa mahmah hi.
© Author